സഞ്ജുവിനെ കുറിച്ച് ആര്‍ക്കും ഒന്നും പറയാനാവില്ല, അപ്പോഴേക്കും ന്യായീകരിക്കാന്‍ ആളുകളെത്തും; ട്രോളി മുന്‍ താരം

ഇന്ത്യയുടെ വിക്കറ്റ് കീപ്പര്‍ ബാറ്റര്‍ സഞ്ജു സാംസണെ വിമര്‍ശിക്കുന്നത് കാണാന്‍ ആരാധകര്‍ ആഗ്രഹിക്കുന്നില്ലെന്ന് മുന്‍ താരവും കമന്റേറ്ററുമായ ആകാശ് ചോപ്ര. ഇംഗ്ലണ്ടിനെതിരായ ടി20

പരമ്പരയിലെ ആദ്യത്തെ മൂന്ന് മത്സരങ്ങളിലും മോശം പ്രകടനമാണ് ഇന്ത്യയുടെ ഓപണിങ് ബാറ്ററായ സഞ്ജു പുറത്തെടുത്തത്. ആദ്യ മൂന്ന് മത്സരങ്ങളില്‍ നിന്ന് ആകെ 34 റണ്‍സ് മാത്രമാണ് മലയാളി വിക്കറ്റ് കീപ്പര്‍ ബാറ്റര്‍ക്ക് നേടാനായത്.

മൂന്ന് മത്സരങ്ങളിലും ജോഫ്ര ആര്‍ച്ചറുടെ ബോളില്‍ പുള്‍ ഷോട്ട് കളിക്കുന്നതിനിടെ പുറത്തായ സഞ്ജുവിനെതിരെ വിമര്‍ശനങ്ങള്‍ രൂക്ഷമാവുകയാണ്. ഇതിനിടെയാണ് ആകാശ് ചോപ്രയും പ്രതികരിച്ച് രംഗത്തെത്തിയത്. മലയാളി താരത്തെ കുറിച്ച് ആരുപറഞ്ഞാലും ആരാധകര്‍ മറ്റു താരങ്ങള്‍ക്കുനേരെ വിരല്‍ ചൂണ്ടുമെന്ന് തന്റെ യൂട്യൂബ് ചാനലില്‍ പങ്കുവെച്ച വീഡിയോയില്‍ ആകാശ് പറഞ്ഞു.

സഞ്ജുവിനെ കുറിച്ച് ആര്‍ക്കും ഒന്നും പറയാന്‍ സാധിക്കില്ല. 'ബൗണ്‍സറുകളിലും ഷോര്‍ട്ട് ബോളുകളിലുമായി ഒരേ രീതിയാണ് സഞ്ജു പുറത്താവുന്നത്. പക്ഷേ സഞ്ജുവിനെ പറ്റി എനിക്കോ നിങ്ങള്‍ക്കോ ഒന്നും പറയാന്‍ പാടില്ല', ആകാശ് ചോപ്ര വീഡിയോയില്‍ പറഞ്ഞു.

സഞ്ജുവിനെ ആരെങ്കിലും വിമര്‍ശിച്ചാല്‍ മറ്റുതാരങ്ങളുടെ പുറത്താക്കലും തിരഞ്ഞെടുപ്പും ചോദ്യം ചെയ്ത് ആരാധകര്‍ രംഗത്തെത്തുമെന്നും ചോപ്ര ചൂണ്ടിക്കാട്ടി. 'സഞ്ജുവിനെ ആരെങ്കിലും കുറ്റപ്പെടുത്തിയാല്‍ ആദ്ദേഹത്തിന്റെ ആരാധകര്‍ മറ്റുള്ള താരങ്ങളുടെ കണക്കുകളുമായി എത്തും. മൂന്ന് മത്സരങ്ങളില്‍ തുടരെ മൂന്ന് തവണയും പുറത്തായാല്‍ എന്താണ് പ്രശ്‌നം? മറ്റുള്ള താരങ്ങളും പുറത്താവുന്നുണ്ടല്ലോ. റിഷഭ് പന്തും ധ്രുവ് ജുറേലുമെല്ലാം പുറത്താവുന്നുണ്ടെന്ന് ആളുകള്‍ ചൂണ്ടിക്കാണിക്കും', പോച്ര കൂട്ടിച്ചേര്‍ത്തു.

ഇംഗ്ലണ്ടിനെതിരായ ആദ്യ മൂന്ന് ട്വന്റി 20കളിലും ഒരേ രീതിയില്‍ പുറത്തായതാണ് മലയാളി താരം സഞ്ജു സാംസണിനെതിരെ വിമര്‍ശനത്തിന് കാരണമായത്. ഇംഗ്ലീഷ് പേസര്‍ ജോഫ്ര ആര്‍ച്ചറിന്റെ ഷോര്‍ട്ട് ബോള്‍ കളിക്കാന്‍ കഴിയാതെയാണ് സഞ്ജു പുറത്താകുന്നത്. ആദ്യ മത്സരത്തില്‍ നന്നായി കളിച്ച ശേഷം 26 റണ്‍സെടുത്ത് സഞ്ജു പുറത്തായി. എന്നാല്‍ പിന്നീടുള്ള മത്സരങ്ങളില്‍ അഞ്ച്, മൂന്ന് എന്നിങ്ങനെയായിരുന്നു താരം സ്‌കോര്‍ ചെയ്തത്.

Content Highlights: Aakash Chopra on Sanju Samson's short-ball issues in IND vs ENG 2025 T20Is